Вазирлик ҳақида Ҳужжатлар Муассасалар Янгиликлар Тадбирлар Лойиҳалар АКТ Оnline хизматлар

Соғлиқни сақлаш вазирлиги: БУХОРОДА ТУРКИЯ СОҒЛИҚ БИЛИМЛАРИ УНИВЕРСИТЕТИ ФИЛИАЛИ ВА КЛИНИКАСИ ОЧИЛАДИ Бош сахифа

02 апреля 2019

Соғлиқни сақлаш вазирлиги: БУХОРОДА ТУРКИЯ СОҒЛИҚ БИЛИМЛАРИ УНИВЕРСИТЕТИ ФИЛИАЛИ ВА КЛИНИКАСИ ОЧИЛАДИ

Мамлакатимизга Туркиянинг Соғлиқ билимлари университети ректори, профессор Жевдет Эрдол бошчилигидаги делегация ташриф буюрди. Қайд этиш жоизки, 1903 йилда ташкил этилган мазкур университет Туркиядаги ягона ихтисослашган тиббиёт университети, шунингдек, Европанинг етакчи таълим муассасаларидан бири ҳисобланади.

Делегациянинг Ўзбекистон Соғлиқни сақлаш вазири Алишер Шадманов билан учрашуви бўлиб ўтди. Мамлакатимизнинг тиббиёт олий ўқув юртлари ректорлари иштирок этган мулоқотда тиббий таълим соҳасида алоқаларни янада кенгайтириш ва ривожлантириш, ҳамкорликда илмий-маърифий тадбирларни ўтказиш имкониятлари муҳокама қилинди.

Учрашув якунида Ўзбекистон тиббиёт олий ўқув юртлари ҳамда Туркия Соғлиқ билимлари университети ўртасида ўзаро англашув меморандумлари имзоланди. Жумладан, томонлар бакалавр ва магистрантларнинг академик алмашинувини ташкил этиш, профессор-ўқитувчилар ва докторантлар учун малака ошириш, турк университетининг филиали базасидаги шифохоналарда ёзги амалиёт ўташ ва қўшма тадқиқот лойиҳаларини амалга ошириш борасида қатор келишувларга эришди.

Бундан ташқари, 2019/2020 ўқув йилида Бухоро давлат тиббиёт институти базасида Туркия Соғлиқ билимлари университети қошидаги Олий тиббиёт мактабининг филиалини ташкил этиш тўғрисида келишувга эришилди. Бухоро давлат тиббиёт институти ҳудудида мазкур тиббиёт университетининг клиникаси ҳам очилади. Таъкидлаш жоизки, икки тиббиёт олий ўқув юртлари ўртасидаги ҳамкорлик ўтган йилдан буён изчил ривожланмоқда. Талабалар ва ўқитувчиларнинг илмий алмашинуви борасида фаол иш олиб борилаётир. Ҳозирга келиб, ана шу ҳамкорлик самараси ўлароқ Бухоро давлат тиббиёт институтининг 40 нафардан зиёд профессор-ўқитувчи ва талабалари Туркияда таълим олди.

Делегациянинг юртимизга ташрифи давом этмоқда.

Соғлиқни сақлаш вазирлиги

Жамоатчилик билан алоқалар бўлими